இறைவன் அருளால் பாடப்பட்ட பா, திருவருட்பா.

திருவருட்பா என்னும் நூலை இயற்றியவர் திருவருட் பிரகாச வள்ளலார் என்னும் சிதம்பரம் இராமலிங்க அடிகளார். இந்நூல் ஆறு திருமுறைகளை உடையது. திரு+அருள்+பா = திருவருட்பா. திரு என்றால் தெய்வத் தன்மை உடையது. அருள்பா என்பது இறைவன் அருளால் பாடப்பட்ட பா என்றேனும் இறைவனின் அருளை விளக்கும் பா என்றேனும் பொருள் கொள்ளலாம்.

இறையருள் நெறி பெற விரும்புவோர் உச்சிமேற் கொண்டாடப்பட வேண்டிய பாடல்கள் இவை. அதில் இருந்து ஒரு பாடலும் விளக்கமும்.

கரையில்வீண் கதையெலா முதிர்கருங் காக்கைபோல்
கதறுவார் கள்ளுண்ட தீக்
கந்தம் நாறிட வூத்தை காதம் நாறிட வுறு
கடும் பொய்யிறு காதம் நாற
வரையில்வாய் கொடுதர்க்க வாதமிடுவார் சிவ
மணங்கமழ் மலர்ப்பொன் வாய்க்கு
மவுன மிடுவாரிவரை மூடரென வோதுறு
வழக்குநல் வழக்கெனினும் நான்
உரையிலவர் தமையுறா துனதுபுகழ் பேசுமவ
ரோடுறவு பெற வருளுவாய்
உயர்தெய்வ யானையொடு குறவர்மட மானுமுள்
ளுவப்புறு குணக் குன்றமே
தரையிலுயர் சென்னையிற் கந்தகோட்டத்துள் வளர்
தலமோங்கு கந்த வேளே
தண்முகத் துய்யமணி யுண்முகச் சைவமணி
சண்முகத் தெய்வ மணியே.

உயர்ந்த தெய்வயானையையும் குறவர் மகளான வள்ளி பெருமாட்டியையும், உள்ளத்தினால் விரும்புகின்ற குணக் குன்று போன்றவனே!

மண்ணுலகத்தில் சிறந்து விளங்கும் சென்னைப் பதியில் உள்ள கந்த கோட்டத்துள் வீற்றிற்கும் முருகப் பெருமானே! குளிர்ந்த ஒளியுடைய மணிகளுள் சிறந்த சைவமணியாய்த் திகழும் ஆறுமுகங்களை உடைய தெய்வமணியே

பேசப் புகுந்தால் பயனில்லாத கதைகளை எல்லாம் முதிய கரிய காக்கையைப் போன்று கதறியுரைப்பவரும், கள் குடித்தலால் உண்டாகும் தீநாற்றம் வீசும் வாயில் உள்ள ஊத்தை நாற்றம் காத தூரம் வரை வீசிட, பேசும் சொற்களில் மிக்குள்ள பொய் இரண்டு காத தூரம் வரை பரவ,

எல்லையில்லாது பேசும் தம் வாய் கொண்டு கொடிய வாதம் செய்வாரும், சிவ மணம் கமழ வேண்டிய மலர் போன்ற தம் அழகிய வாயால் மௌனம் கொள்பவரும் என்னும் இவர்களை மூடர் எனக் கூறும் உலக வழக்கு நல்ல வழக்கு எனக் கூறப்படுமாயினும்,

கூறுமிடத்து நான் அவர்களது உறவைக் கொள்ளாமல் நின் புகழினைப் பேசுபவருடன் உறவைக் கொள்ளல் வேண்டும்.

திருவருட்ப்பாவும் அதன் விளக்கமும் அருமை

தங்களுக்கு பூரண இறையருள் கிடைக்க
எங்கள் குலப் பெருமான் திருப்பரங்குன்றம் முருகப்​ பெருமானை
வேண்டிக் ​கொள்கிறேன்,
நன்றி,

வள்ளலார் பெருமானின் மற்ற பாடல்களையும் விளக்குங்கள்.
உபயோகமாக இருக்கும்.
மிக்க நன்றி