குருகுல கல்வி

ஒழுக்கம், கட்டுப்பாடு எனுமிரண்டும் குருகுல வாழ்க்கையில் முக்கிய இடம் பெறுகின்றன. ஒழுக்கத்தில் இருந்துதான் பண்பாடு வருகிறது. 'ஒழுக்கம் உயிரினும் மேலானது' என்று வள்ளுவர் கூறியிருக்கின்றார். ஒழுக்கத்தில் இருந்துதான் மேன்மை உண்டாகிறது. கட்டுப்பாடான வாழ்விலிருந்து திடகாத்திரமான உடலும் நோயற்ற உடலும் வந்து அமைகின்றன. மனத்தை நம் வசத்துக்குக் கொண்டு வருவதற்கும் கட்டுப்பாடான வாழ்வு உதவுகிறது. மனக்கட்டுப்பாட்டிலிருந்துதான் மேன்மைகள் அனைத்தும் ஏற்படுகின்றன. ஆகையால், உண்பதிலும், உறங்குவதிலும் உழைப்பதிலும் ஒழுக்கமும், கட்டுப்பாடும் இன்றியமையாதவையாகின்றன. காந்திகிராம கிராமியப் பல்கலைக்கழக குருகுல அமைப்பு முறையின் மாணவர்களாகிய நீங்கள் கட்டான உடம்பும், உறுதியான மனமும், கூர்மையான புத்தியும் உடையவர்களாக விளங்க வேண்டும். எனவே, பல்கலைக்கழக குருகுல அமைப்பு முறை, ஒழுக்கம் மற்றும் கட்டுப்பாடான வாழ்க்கை முறையை அமைப்பதற்கு அனைத்து ஆசிரியர்கள் மூலம் போதிய வழிகாட்டி வருகிறது.


காந்தியக் கண்ணோட்டத்தில் மாணவர்கள்
மாணவருக்கு அழகு, பணிவுடைமை மட்டுமல்ல – பணிவில்லையேல் படிப்பே வருவதில்லை என்பதும் உண்மையே.
மாணவர் ஆசிரியரிடம் நம்பிக்கையும், பணிவும் சேவா மனப்பான்மையும்; கொண்டிருக்க வேண்டும்; ஆசிரியர் சொல்வதெல்லாம் தன் நன்மைக்கே என்ற நம்பிக்கை கொள்ள வேண்டும்.
மாணவர் தன் ஐயங்களை ஆசிரியரிடம் தெரிவித்து அவற்றிற்கு விளக்கம் பெற வேண்டும்.
ஆசிரியருக்குத் தெரிந்தவகளையெல்லாம் ஒரே நாளில் கற்றுவிடுவதற்கான அதிக ஆசை மாணவருக்குக் கூடாது. பணிவுடன் ஆசிரியர் மனத்தைத் திருப்தி செய்யும் மாணவருக்குத் தமக்குத் தெரிந்தவற்றையெல்லாம் போதிக்க வேண்டுமென்ற ஆவல் ஆசிரியருக்கு இயல்பாகவே உண்டாகும். ஆசிரியருக்கு இத்தகைய ஆவல் உண்டாகும் வரை மாணவர் பொறுமையுடன் காத்திருக்க வேண்டியதே.
ஆனால், ஆசிரியர் ஞானத்தைச் சொரியத் தொடங்குகையில் மாணவர்கள் அசட்டையாக இருந்து சந்தர்ப்பத்தை நழுவ விடலாகாது. (மூலம் : கிசோர்லால் க. மஸ்ரூவாலா (2000) காந்திய நவநீதம், -காந்தியச் சிந்தனைகள் களஞ்சியம், காந்திய இலக்கியச் சங்கம், மதுரை. பக். 158-160)

பல்கலைக்கழக குருகுல அமைப்பைச் சார்ந்த மாணவர்கள் கீழ்க்கண்ட பாடலை மனத்தில் கொண்டு அன்றாடம் கல்வி கற்கலாம்:

ஞானம் ஓங்கிடக் கொட்டு முரசே – நல்ல
பண்பு வளர்ந்திடக் கொட்டு முரசே
நல்லோர்கள் ஆட்சிபெறக் கொட்டு முரசே – சிறந்த
குருகுலக் கல்வி வளர்ந்திடக் கொட்டு முரசே!

குருகுலக் கல்வி என்பது காந்தியக் கல்வி முறையாகும். எனவே, அனைத்துச் சீடர்களாகிய மாணவர்களும் குருவாகிய - பேராசிரியர்களின் வழிகாட்டுதல் மூலம் முறையாகக் கல்வி கற்று எதிர்கால வாழ்க்கையைச் சிறப்பாக அமைத்துக்கொள்வது ஒவ்வொரு மாணவரின் கடமையாகும்.

வாழ்க குருகுல அமைப்பு மாணவர்கள்! வளர்க காந்தியக் கல்வி! வளர்க காந்திகிராம கிராமியப் பல்கலைக்கழக குருகுல அமைப்பு முறை!