கஜேந்திரனை காப்பாற்றிய பெருமாள்

பெருமாளுக்கு மலர்கள் என்றால் அதிகம் பிரியம். இதனால் முன்னொரு காலத்தில் கஜேந்திரன் என்ற ஒரு யானை மலர்களை பறித்து பூஜை செய்து வந்தது.

ஒருநாள் அந்த யானை குளத்தில் இறங்கி தாமரை மலர்களை பறிக்க முயன்றது. அப்போது அதன் காலை ஒரு முதலை கவ்வியது. அதன் பிடியில் இருந்து தப்பிக்க யானை செய்த கடும் முயற்சிகள் பயன் அளிக்கவில்லை. முதலைக்கு நீரில் பலம் அதிகம் என்பதால் யானையால் எவ்வளவோ போராடியும் தப்பிக்க முடியவில்லை.

இதனால், அந்த யானை தன்னை காப்பாற்றுமாறு பெருமாளை அழைத்தது. தன் மீது பக்தியாக இருக்கும் யானையின் அபய குரலை கேட்ட பெருமாள் உடனே ஓடிவந்தார். யானையைக் காக்கும் அவசரத்தில் அவர் வந்ததால், தன் வாகனமான கருடனைக்கூட அழைக்காமல் புறப்பட்டுவிட்டார். அதேநேரம், இதையறிந்த கருடன் பெருமாளின் வேகம் கண்டு, அதற்கேற்ப அனுசரித்து தன் மீது அவரை ஏற்றிக்கொண்டு வந்தது.

அப்படியும் தான் யானை இருக்கும் இடத்துக்கு செல்வதற்குள் அதற்கு தீங்கு ஏதும் ஏற்பட்டு விடக்கூடாதே என பெருமாள் கருதி தன் சக்கரத்தை ஏவினார். அந்த சக்கரம் சுழன்று சென்று முதலையின் தலையை துண்டாக்கியது. இதனால் யானை அதன் பிடியில் இருந்து தப்பியது.

இப்படி யானையின் உயிரை காக்க பெருமாள் சக்கரத்தை ஏவி அருள்புரிந்த நிகழ்ச்சியை கஜேந்திர மோட்ச விழாவாக அனைத்து பெருமாள் கோவில்களிலும் கொண்டாடுகிறார்கள்.