வைகுண்ட ஏகாதசி உருவானது எப்படி?

வைகுண்ட ஏகாதசி உருவானதற்கு சில கதைகள் கூறப்படுகின்றன. அவை:

* முராசுரன் என்ற அரக்கன் தேவர்களை துன்புறுத்தினான். அவர்கள் மகாவிஷ்ணுவிடம் அடைக்கலம் புகுந்தனர். அவர்களுக்காக முராசுரனை எதிர்த்து போரிட்டார் விஷ்ணு. போரின் முடிவில் அவர் ஓய்வெடுத்துக் கொண்டிருந்தபோது, முராசுரன் அவரை தாக்க வந்தான். அப்போது, விஷ்ணுவுக்குள் இருந்த `சக்தி` பெண் உருவம் எடுத்து, அந்த அரக்கனை எரித்து அழித்தது. அந்த சக்திக்கு `ஏகாதசி` என்று பெயர் சூட்டி, "உன்னை வழிபடுபவர்களுக்கு வைகுண்டத்தில் இடமளிப்பேன்'' என்று வரம் அருளினார் விஷ்ணு.

* வைகானசன் என்ற அரசன், தனது மூதாதையர் நரகத்தில் அவதிப்படுவதையும், அவர்கள் அதில் இருந்து தங்களை காக்குமாறு வேண்டுவதையும் கனவாக கண்டான். இதையடுத்து அவன், முனிபுங்கர் என்ற முனிவரை சந்தித்து கனவில் வந்ததை கூறினான். அந்த முனிவரும், அரசனது மூதாதையர் நரகத்தில் இருந்து விடுபட வழிகூறினார். அதன்படி, வைகானசன் ஏகாதசி விரதம் இருந்து, அதை நரகத்தில் வாடும் தனது மூதாதையர்களுக்கு அர்ப்பணம் செய்தான். நரகத்தில் அவதிப்பட்ட அவனது மூதாதையர், அங்கிருந்தவாறே வைகானசனை வாழ்த்திவிட்டு சொர்க்கலோகம் புகுந்தனர். அப்போது முதல் வைகானசன் ஏகாதசி விரதத்தை மேற்கொள்ள ஆரம்பித்தான்.

- இப்படித்தான் வைகுண்ட ஏகாதசி விரதம் உருவானதாக கூறுகிறார்கள்.