அளவான விரதம் போதும் - ரமணர்

by **ஹரி ஓம்** Mon Aug 29, 2011 7:31 pm

* சாத்வீகமான உணவை மிதமாகச் சாப்பிடுவது தியானத்திற்கு துணை செய்யும். ஜீரணக்கருவிகள் எரிச்சல் எதுவும் இல்லாமல் இருக்க வேண்டும். மிளகாய், உப்பு, வெங்காயம், போதை தரும் பொருட்கள் ஆகியவை இல்லாமல் இருக்க வேண்டும்.

* மூளையை மந்தமாக்கும், தூக்கத்தை தரும், உணர்ச்சிகளைத் தூண்டும், சோம்பலைத் தரும் உணவுகளைத் தவிர்க்க வேண்டும். சாத்வீகமான குளிர்ச்சியைத் தரும் உணவுவகைகளை உண்பதே நல்லது.

* உணவை அதிகமாகச் சாப்பிட்டால் வயிற்றுக் கோளாறுகள், மலச்சிக்கல் ஆகியவை தோன்றக்கூடும். ஆகவே, தேவைக்குச் சற்று குறைவாகவே உணவு உண்பது எப்போதும் நன்மையைத் தரும்.

* பழம், காய்கறிகள், பால், ரொட்டி போன்ற உணவுகள் சாத்வீக உணர்வை வலுப்படுத்தக் கூடியவையாகும். இதனால், உடல்வலிமை குறைந்து விடுமோ என்று அஞ்ச வேண்டியதில்லை. எப்போதும் சற்று குறைவான உணவே மனத்தை வலிமையாக்கக் கூடியதாகவே இருக்கும்.

* விரதம், பட்டினி ஆகியவற்றால் உணவின் மீது கொள்ளும் பற்று மெல்ல மெல்ல குறைந்து போகிறது. வெறும் விரதத்தால் மட்டுமே ஆன்மிக லட்சியத்தை அடைய முடியாது.

* அடிக்கடி பட்டினி கிடப்பதால் உடல் வலிமை குறைந்து விடும். அது நோய்களை வரவழைக்கும் அளவிற்குப் போய்விடக் கூடாது. மிதமான உணவும், அமைதியான சிந்தனையுமே துணையாக அமைந்து விட இயலும்.