ஒவ்வொரு ஜாதகத்திற்கும் தனித்தனியான குரு பெயர்ச்சி பலன்களை எப்படி உணருவது – பாகம் 1

by **tmm_raj_ramesh** Fri May 18, 2012 5:41 pm

ஒவ்வொரு ஜாதகத்திற்கும் தனித்தனியான குரு பெயர்ச்சி பலன்களை எப்படி உணருவது – பாகம் 1

பொதுவாக கிரகப் பெயர்ச்சி பலன்கள் சந்திரன் முதல் கணக்கிடப்படுகிறது. அதாவது ஜென்ம ராசியை முதல் ராசியாகக் கொண்டு பெயர்ச்சி பலன்கள் கூறப்படுகின்றன. அது பொதுவான ஒன்று தான். ஜெனன ஜாதகத்தில் உள்ள கிரக சூழ்நிலை தான் உண்மையானது. ஜெனன ஜாதகம் மற்றும் திசையிறுப்பு தான் உண்மையான பலன்களைத் தரும். அதில் கோச்சாரத்தின் பங்கும் உண்டு ஆனால் அது ஜெனன ஜாதகத்ததை வைத்தே கூறப்பட வேண்டும். தனியா கோச்சாரத்தையும் ராசியை வைத்தும் கூறப்படும் பலன்கள் முழுமையாக இருக்காது.

17 மே 2012 வியாழன் மாலை 6-15 மணிக்கு ரிசப ராசிக்கு பெயர்ச்சியாகும் குருபகவான் தரும் பலன்களை ஜெனன கால சாதகத்ததை வைத்து எப்படி கணிப்பது.?

குருவின் பலம்.
ஜெனன கால சாதகத்தில் குரு பகவானின் பலம் என்ன என்று தெரிந்து வைத்திருத்தல் வேண்டும். அஷ்டவர்க்கம் சட்பலம் மூலமாக குருவின் பலம் என்ன என்று அறிந்துகொள்ளலாம்.

அஷ்டவர்கத்தில் குரு பெறும் பலம் அனைத்து கிரகங்களாலும் உருவானது ஆகும். சட்பலத்தில் அது தனித்துவமான பலமாகும்.

அஷ்டவர்க்கத்தில் தனது சுய வர்க்கத்தில் நான்கு அல்லது அதற்கு மேற்பட்ட மதிப்பெண் இருந்தால் குரு பலமாக இருக்கிறார் என்று பொருள். அதே போல் சர்வ அஷ்டவர்க்கத்தில் குரு இருக்கும் பாவம் 28 மதிப்பெண்கள் மேல் இருந்தால் நல்ல பாவத்தில் அமர்ந்திருக்கிறார் என்று பொருள். அப்படி அமர்ந்த குரு நன்மையை செய்ய கடமைப் பட்டவராகிறார். மற்றும் மற்ற கிரகங்களால் வரும் தீமையையும் குறைக்க வழி செய்வார்.

சட்பலத்தில் முதல் இரண்டு இடங்களில் வரும் குரு பகவான் நல்லதை குறித்த காலத்தில் செய்து விடுவார். அவருடைய தனிப்பட்ட பலம் அவருடைய பார்வைபட்ட இடங்களில் (5, 7, 9 - பாவங்களில்) நல்ல பலனை ஜாதகர் அடைவர்.

நல்ல நிலையில் உள்ள குரு பகவான் எந்த ராசியானாலும் கோச்சாரத்தில் எந்த நிலையில் இருந்தாலும் நன்மையைச் செய்வார் பிறகு எதற்கு கோச்சாரம் பார்க்கப் பட வேண்டும்?

கோச்சாரத்தில் உள்ள குரு ஜென்ம குருவிற்கு கட்டுப்பட்டவர்.

ஜென்ம குரு பலமில்லாத போது, கோச்சார குருவும் பலமிலந்தால் அங்கே நற்பலன்கள் கிடைப்பதில் தாமதமும் தடைகளும் உண்டாகும். தீமைகளைத் தடுக்கக்கூடிய மனோதைரியம், முடிவெடுப்பதில் தாமதம், சரியான முடிவுஎடுக்க முடியாமை ஏற்படும். வாழ்க்கை முழுவதும் நிதானம் பொறுமை வழிபாடு போன்றவற்றை விடாமல் கடைபிடித்தால் தப்பித்துக் கொள்ளலாம்.

ஜென்ம குரு உள்ள பலமில்லாத போது, கோச்சார குரு பலமாக இருந்தால் அங்கே நற்பலன்கள் கிடைக்கிறதோ இல்லையோ தீயபலன்கள் வரும் முன் ஜாதகர் அதை உணர்ந்து தப்பித்துக் கொள்வார். வாழ்க்கை முழுவதும் நிதானம் பொறுமை வழிபாடு போன்றவற்றை விடாமல் கடைப்பிடித்தால் வெற்றிக்கான வழிகளை உணரமுடியும்.

ஜென்ம குரு பலமாக உள்ள போது, கோச்சார குரு பலமிலந்தால் அங்கே நற்பலன்கள் கிடைக்கும் ஆனால் ஜாதகர் அதை மற்ற வழிகளில் இழப்பதற்கு வாய்ப்புகள் அதிகம். அதனால் வெற்றியை ருசிக்கும் அதே நேரம் நன்கு சிந்தித்து புதிய முடிவுகளை எடுக்க வேண்டும்.

ஜென்ம குரு பலமாக உள்ள போது, கோச்சார குருவும் பலமாக இருந்தால் அங்கே நற்பலன்கள் நிச்சயமாக கிடைக்கும். இந்த சமயங்களில் தான் தன்னுடைய புண்ணி பலத்தைச் சேர்க்க தான தர்மங்கள் செய்ய வேண்டும்.

மேற்கூறிய எல்லாம் திசா புத்தி அந்தரங்களுக்கு கட்டுப்பட்டவையே. நடப்பு திசா புத்தி அந்தரங்களுக்கும் ஜென்ம மற்றும் கோச்சார குருவிற்கும் உள்ள தொரடர்பை தொடர்ந்து பார்க்கலாம்.