சத்சங்கத்தின் பெருமை...

சத்சங்கம் எனப்படுவது யாது?

"சத்சங்கத்தின் இயல்பினையும் அதன் சிறப்பினையும் பிரம்மரிஷி வசிஷ்டர், இராமபிரானுக்கு இவ்விதம் எடுத்தியம்புகிறார்:

"இராமா, அறிந்துகொள்.

நல்லோர் சேர்க்கையாலேயே நல்லது எது கேட்டது எது எனப் பகுத்தறியும் ஞானம் மலரும்.
இதனால் எல்லா செல்வமும் அடைய முடியும்.

சத்சங்கம் எல்லா ஆபத்துகளையும் தவிர்க்க உதவும். நமது ஆன்ம வளர்ச்சிக்கு தடங்கலாய் இருக்கும் அறியாமையை நீக்க வல்ல வலிமை சத்சங்கத்தினால் மட்டுமே கிட்டும்.

அறியாமையை அழிப்பதும், உலகைப் புரிந்துகொள்ள உதவுவதும், மனதின் வியாதிகளை போக்க உதவுவதும் இந்த சத்சங்கமே...

மழைக்குப் பிறகு எவ்வாறு பூக்கள் அழுக்கு நீங்கப் பெற்று அவற்றின் அழகு பிரகாசிக்குமோ... அவ்விதமே சத்சங்கத்தினால் நமது அறிவு பிரகாசிக்கும்.

எப்படிப்பட்ட துன்பம் வந்தாலும், தீர்க்க முடியாத பிரச்சனைகள் வந்தாலும் கூட நல்லோர் சேர்க்கையை (சத்சங்கம்) விட்டுவிடல் கூடாது.

சத்சங்கம் நல்ல வழியை காட்டும். நம்முள்ளேயுள்ள இருட்டை சூரிய ஒளி போல் நீக்கும். ஆகையால், நல்ல புத்திசாலி சத்சங்கத்தை விட்டு நீங்க மாட்டான்.

சத்சங்கம் ஏழ்மை, இறப்பு, உலகின் ஏற்றத்தாழ்வு போன்ற வியாதிகளை போக்க வல்ல நல் மருந்தாகும்.

மன அமைதி, எதையும் ஆய்ந்தறிதல், சத்சங்கம் இவையே மகிழ்ச்சி தருவன.
இவைகளின் துணையிருந்தால், சம்சார சாகரத்தை துன்பமின்றி கடத்தல் ஏதுவாகும்."

("இராமகீதை" எனும் "யோக வாசிஷ்ட"த்திலிருந்து..)

அன்புடன்,
சுந்தரேசன் புருஷோத்தமன்