ஆண்டாளுக்கு வயது 5018

by **ராகவா** Tue Aug 19, 2014 12:12 am

ஆடிதோறும் பூரநட்சத்திரம் வந்துகொண்டுதான் இருந்தது. ஆனால், ஆண்டாள் அவதரித்தபின் தான் அந்நாளுக்கு தனிச்சிறப்பு உண்டானது. அவள் பூமிப்பிராட்டியின் அம்சம். கிணற்றில் விழுந்த குழந்தையைக் காக்க எண்ணிய தாய், தானே கிணற்றுக்குள் குதிப்பதைப் போல, "பாசம்', "ஆசை' என்னும் கிணற்றுக்குள் தத்தளித்துக் கொண்டிருக்கும் உயிர்களை காப்பாற்றி, பரந்தாமனிடம் சேர்க்க பூவுலகில் அவதரித்தாள்.
பிறந்த வருடம்: ஸ்ரீவில்லிபுத்தூரிலுள்ள நந்தவனத்தில், ஒரு துளசிச் செடியின் அடியில், கலியுகம் பிறந்து 98வதாக நிகழ்ந்த நளவருடத்தில் ஆண்டாள் அவதரித்தாள். ஆடிமாதம் வளர்பிறை பஞ்சமி திதியும், பூரநட்சத்திரமும், செவ்வாய்க்கிழமையும் கூடிய நன்னாளில் பெரியாழ்வார் அவளைக் கண்டெடுத்தார். தற்போது கலியுகம் 5115 நடக்கிறது.
இவ்வகையில், ஆண்டாளுக்கு இவ்வாண்டு 5018 வது பிறந்த நாள். தான் பூஜித்து வந்த வடபத்ரசாயி (ஸ்ரீவில்லிபுத்தூர் மூலவர்) குழந்தையை எடுத்துச் சென்றார். அவளுக்கு "கோதை என்னும் பெயரிட்டு வளர்த்து வரும்படி அவர் அருள்புரிந்தார். "கோதை' என்றால் "நல்வாக்கு அருள்பவள்' எனப்பொருள். ஆண்டாள் பெருமாளிடம் கொண்ட பக்தி காதலாக மாறியது. அவரையே தன் கணவனாக நினைத்து வாழத் தொடங்கினாள். கண்ணனோடு வாழ்ந்த கோபியர்களில் ஒருத்தியாக தன்னைக் கருதிக் கொண்டாள். ஸ்ரீவில்லிபுத்தூரை கண்ணன் வசித்த ஆயர்பாடியாக கற்பனை செய்து, அங்குள்ள பெண்களை கோபியராகச் சித்தரித்து, அனைவருமாக இணைந்து பாவை நோன்பு நோற்பதாக முப்பது பாடல்கள் எழுதினாள். அதுவே திருப்பாவை என்னும் இனிய நூல் ஆயிற்று. ஸ்ரீவில்லிபுத்தூர் கோயிலை கண்ணனின் தந்தை நந்தகோபன் வசித்த மாளிகையாகக் கருதினாள்.
வாரணம் ஆயிரம்: கண்ணன் குறித்து தான் கண்ட கனவினை, நாச்சியார் திருமொழி என்னும் நூலில் ஆண்டாள் அழகாக விவரிக்கிறாள். "வாரணமாயிரம்' என்ற பாசுரத்தில்,""ஆயிரம் யானைகள் சூழ வலம் வருகின்றன. பூரண தீர்த்தம் கொண்ட பொற்குடங்களும், மாவிலைத் தோரணங்களுமாக எங்கும் மங்கல காட்சி! மங்கல தீர்த்தக் குடங்களை நாலாபுறங்களிலும் ஏந்திக் கொண்டு வருகிறார்கள். மணமகளுக்குரிய புதுபட்டாடையையும், மாலையும் சூட்டப்படுகிறது. மத்தளம் முழங்குகிறது. திருச்சங்கு முழங்கப் பெறுகிறது.
முத்துக்களாலான பந்தலின் கீழ் மதுசூதனனாகிய திருமால், அவளது கைத்தலம் (உள்ளங்கை) பற்றினார்,'' என குறிப்பிடுகிறாள். அதிகாலைப் பொழுதினில் கண்ட கனவல்லவா? சீக்கிரமே பலித்து விட்டது. ஆம்! கனவில் கண்டது போல், ஆண்டாள் கண்ணனை மணம் செய்து அவனையே ஆளத்துவங்கி விட்டாள். அதனால் "ஆண்டாள்' என பெயர் பெற்றாள்.
ஆண்டாள் கிளி: ஆண்டாள் என்றதும் அவளது கொண்டையும், கிளியும் ஞாபகத்துக்கு வந்து விடும். உற்சவர் ஆண்டாளுக்கு தினமும் மரவள்ளிக்கிழங்கு இலை, மாதுளம் பூக்கள், குச்சிகள் கொண்டு செய்யப்படும் கிளி சாத்தப்படுகிறது. ஆண்டாள் ஏந்திய கிளியை நம் இல்லத்தில் வைத்து பூஜித்தால் தடைபடும் திருமணம் விரைவில் நடக்கும். மகப்பேறு வேண்டுவோர் நன்மக்கள் வாய்க்கப் பெறுவர். கிளிக்குச் "சுகம்' என்றொரு பெயருண்டு. வாழ்வில் எல்லாவிதமான சுகங்களையும் பெற விரும்புவோர் ஆண்டாள் சூடிய கிளியினை வழிபட சுகமாக வாழ்வர் என்பது நம்பிக்கை.
மங்களாசாசனக் கோயில்கள்: ஆழ்வார்களால் மங்களாசாசனம் செய்யப்பட்ட (பாடப்பெற்ற) 108 கோயில்கள், திவ்யதேசங்கள் என்று அழைக்கப்பெறும்.
சூடிக்கொடுத்த சுடர்க்கொடியாகிய ஆண்டாளால் பாடப்பட்ட திவ்யதேசங்கள் ஸ்ரீவில்லிபுத்தூர், ஸ்ரீரங்கம், திருப்பதி, திருமாலிருஞ்சோலை (மதுரை கள்ளழகர்கோவில்), திருக்கண்ணபுரம், திருக்குடந்தை (கும்பகோணம்), திருஆய்ப்பாடி, வடமதுரை (மதுரா), துவாரகை ஆகியவை ஆகும். இத்திருப்பதிகளில் எழுந்தருளியுள்ள எம்பெருமான்களை ஆண்டாள், நாச்சியார் திருமொழியில் போற்றிப் பாடியிருக்கிறாள்.
இருப்பிடம்: மதுரையில் இருந்து 90 கி.மீ.,
போன்: 04563 - 260 254.

-தினமலர்