தஞ்சை பெரிய கோயில்.

பெரிய கோயில் , பெருவுடையார் கோயில், பிரகதீஸ்வரர் கோயில் என அழைக்கப்படும், தஞ்சை பெரிய கோயில், மிகவும் புகழ் வாய்ந்தது. தஞ்சாவூர் நகரின் மையமாக அமைந்திருக்கும் இந்த சிவன் கோயிலில் இறைவன் பிரம்மாண்டமான லிங்க வடிவில் காட்சி அருளுகிறார்.

ஆழ்வார்களால் போற்றப்பட்ட வைணவத்தலங்கள் 108, நாயன்மார்களால் போற்றப்பட்ட சைவத்தலங்கள் 274, தஞ்சை பெரியகோயில் அந்த 274 சைவ திருத்தலங்களுள் ஒன்று.

ராஜ ராஜ சோழனால் கிட்டத்தட்ட 1000 ஆண்டுகளுக்கு முன்னர் கட்டப்பட்ட இந்தக்கோயிலில் எல்லாமே பெரிதுதான். பிரம்மாண்டமான இறைவனின் வடிவம், பெரிய நந்தி, நீண்ட அகண்ட பிரகாரங்கள் ( 500 அடி நீளம், 250 அகலம்) என அனைத்துமே அழகுற வடிவமைக்கப்பட்டுள்ளன. 

கட்டிடக்கலைக்கு ஒரு உன்னதமான உதாரணமாக விளங்கும் இந்த கோயில் முழுதும் கற்களால் கட்டப்பட்டது. ஆச்சரியம் என்னவெனில் தஞ்சையின் மண்வளம் காவிரிப்படுகையில் உள்ள பொன் (நெல்) விளையும் பூமி, பாறைகள் அங்கு இல்லை

இந்தக்கோயிலில் வைத்துத்தான் திருமுறைகளை மீட்ட சோழ மன்னர் அவற்றை இறைவன் முன்னிலையில் மக்களுக்கு அர்ப்பணித்தார் என செய்தி உண்டு.

பொதுவாக ஆகம விதிகளின்படி கருவறையின் மேலுள்ள விமான கோபுரம் அளவில் சிறியதாகவும், கோயிலினுள் நுழையும் நுழைவு கோபுரங்கள் பெரிதாகவும் இருப்பது மரபு.

அந்த மரபினை முதலில் தகர்த்து தஞ்சை பெரிய கோயிலில் நுழைவு கோபுரத்தை சிறிதாகவும் , விமான கோபுரத்தை மிகப் பெரிதாகவும் படைத்தவர் ராஜராஜ சோழர். 

தமிழகத்தைப் பொருத்தவரை இதுபோல கோபுரங்கள் அமைந்தது மொத்தம் 4 கோயில்களே.

அவையனைத்தும் ராஜ ராஜசோழனின் அடுத்த தலைமுறையினரால் கட்டப்பட்டவை. 
பிற்கால சோழர்கள் கட்டிய கோயில்கள் மீண்டும் பழையபடி சிறிய விமான கோபுரம் கொண்டே அமைக்கப்பட்டன.


இந்த புகழ் பெற்ற கோபுரம் 200 அடி உயரம் கொண்டது. இதன் உச்சியில் இருக்கும் எண்கோண சிகரம் 81 டன் எடை கொண்ட ஒரே கல்லால் ஆனது. இக்கல்லை உச்சிக்கு கொண்டுசெல்ல மண்ணால் ஆன 6 கி,மீ நீள சாய்பாதை (Ramp) அமைக்கப்பட்டது.

இந்த அசைபடத்தையும் பாருங்கள்

தஞ்சை பெரிய கோவிலை நேரில் பார்த்தபோது , வியப்பிலும் பிரம்மிப்பிலும் சிலை போல நெடுநேரம் நின்று ரசித்துக்கொண்டிருந்தேன். தமிழகத்தில் இக்கோவில் இருப்பது நமக்கெல்லாம் பெருமையே!!! 

இக்கோவிலின் புகைப்படம் ஒன்று Panorama முறையில் எடுத்தது முன்பு மின்னஞ்சலில் வந்தது. மிகவும் அற்புதமான படம். உங்கள் பார்வைக்கு.--