கொம்பு இடிக்கிறது

'நாராயணீயம்'என்ர நூலை இயற்றிய நாராயண பட்டத்ரியின் பெருமைகளைக் கேட்ட குட்டப்பன் என்னும் பக்தன்,அவரிடம் சென்று தன்னை ஒரு சீடனாக ஏற்கும்படி வேண்டினான். ஆனால்,அவன் கல்வியறிவு இல்லாதவன் என்பதால் ,அவனை சீடனாக ஏற்காமல் சமையல்கட்டில் உதவியாக இருக்கச் சொன்னார் நாராயணர். ஒருநாள் அவன் நாராயணரிடம்,'குருவாயூரப்பன் எப்படி இருப்பார்?' எனக் கேட்டான். ஏதோ எரிச்சலில்,"எருமை வடிவில் இருப்பார்" எனக் கூறிவிட்டார். குரு சொன்னால் சரியாக இருக்கும் என நம்பிய சீடனும் குருவாயூரப்பனை எருமையாகவோ பாவித்து வணங்க ஆரம்பித்தான். ஒரு முறை நாராயண பட்டத்ரி கோயிலுக்குச் சென்றபோது அவருடன் சென்றான் குட்டப்பன் அப்போது,வீதியுலா கொண்டு செல்வதற்காக உற்ஸவரை சன்னிதிக்குள் இருந்து வெளியே கொண்டு வர முயற்சி செய்தனர். ஆனால் முடியவில்லை. அங்கிருந்தவர்கள் தவித்துக் கொண்டிருந்தபோது குட்டப்பன் நாராயணரிடம் 'சுவாமியின் கொம்பு இடிக்கிறது.அதனால்தான் வெளியே கொண்டு வர முடியவில்லை'என்றான். நாராயண பட்டத்ரி உள்ளே கவனித்தபோது,சுவாமி எருமை வடிவில் காட்சி தந்தார். குட்டப்பனின் பக்தியையும் பெருமையையும் அப்போதுதான் உணர்ந்தார் நாராயண பட்டத்ரி.