கந்தக் கடவுளை வணங்கிச் செல்; வெற்றி நிச்சயம்!

by **ஆனந்தபைரவர்** Tue Nov 02, 2010 10:00 pm

கந்தக் கடவுளை வணங்கிச் செல்; வெற்றி நிச்சயம்!' என்று சித்தர் ஒருவர் மன்னரிடம் சொல்ல... அதன்படி வேலவனை வழிபட்டுப் போர்க்களம் சென்ற மன்னர், போரில் வெற்றி பெற்றார். அவர், ராஜேந்திர சோழன்! பிறகு, அவர் இந்தக் கோயிலை விரிவுபடுத்திக் கட்டினார் என்கிறது ஸ்தல வரலாறு.

கொங்கணச் சித்தர் நீண்டகாலம் தங்கி வழிபட்டதால், இந்த மலை, கொங்கண மலை என அழைக்கப்பட்டு, தற்போது 'அலவாய் மலை' எனப்படுகிறது. நாமக்கல் மாவட்டம், ராசிபுரத்தில் இருந்து சுமார் 8 கி.மீ. தொலைவில் உள்ளது அலவாய்ப்பட்டி. இந்த ஊரில், அழகு ததும்பும் மலையில் குடியமர்ந்து, அருளும் பொருளும் அள்ளித் தருகிறார் ஸ்ரீபாலசுப்ரமணிய ஸ்வாமி.

தலத்தில், முருகப்பெருமானின் சந்நிதிக்கு முன்பாக, மயிலும் நந்தியும் ஒருங்கே அமைந்திருப்பது சிறப்பு. ஒருகாலத்தில், கரடுமுரடான பாதையில் ஏறிச் சென்றுதான் ஸ்வாமி தரிசனம் பெறமுடியுமாம். பழநியில், குழந்தை இல்லாத ஏக்கத்தில் தவித்து மருகிய ஒரு பக்தரின் கனவில் முருகப்பெருமான் தோன்றி, அலவாய் மலையைக் குறிப்பிட்டுச் சொல்லி, 'பக்தர்களுக்கு வசதியாக மலையில் படிக்கட்டுகள் அமைத்துக் கொடு! இந்தப் பணி முடியும் வேளையில், உனக்குக் குழந்தை பிறக்கும்' என்று அருளினாராம். அதன்படி, அந்தப் பக்தர் ஓடோடி வந்து, கந்தனைத் தரிசித்து, அன்பர்களின் வசதிக்காக மலையில் படிக்கட்டுகள் அமைத்துக் கொடுத்ததாகவும், அந்தப் பணி முடிவுறும் நேரத்தில் அவருக்குக் குழந்தை பிறந்து மகிழ்ச்சியில் ஆழ்த்தியதாகவும் சொல்வர்.

இங்கேயுள்ள சுனை நீர் வற்றவே வற்றாதாம்! இந்த நீரைப் பருகிவிட்டு முருகப்பெருமானைத் தரிசித்தால், பெண்களுக்குப் பூப்படைவதில் உள்ள சிக்கல்கள் நீங்கும்; விரைவில் பூப்பெய்துவார்கள் என்கின்றனர். கர்ப்பப்பை கோளாறுகளால் அவதிப்படும் பெண்களும் இந்த சுனைநீர் தீர்த்தத்தைப் பருகினால், குணம் பெறுவார்களாம்.
கந்தக் கடவுள் குடிகொண்டிருக்கும் மலையில் ஸ்ரீஆஞ்சநேயர், தெற்குப் பார்த்தபடி காட்சி தருகிறார். இவரை வணங்கினால், சனி தோஷங்கள் யாவும் விலகும் என்பது நம்பிக்கை!

கார்த்திகை மாத திங்கட்கிழமையில் இங்கு வந்து, வேலவனை வேண்டினால், அடுத்த கார்த்திகைக்குள் குடும்பச் சிக்கல்கள் யாவும் நீங்கிவிடும்; பிரிந்தவர்கள் ஒன்று சேருவர் என்கின்றனர் பக்தர்கள். கந்த சஷ்டியில் விரதமிருந்து, கந்தக் கடவுளுக்கு நெய் தீபமேற்றி வணங்கினால், குழந்தை பாக்கியம் கிடைக்கப் பெறுவர் எனச் சிலாகிக்கின்றனர் பெண்கள்.

நன்றி சக்தி விகடன்