1006 கோயில்களில் குடமுழுக்கு

வரும் நிதியாண்டில் (2012-2013) மாநிலத்தில் உள்ள 1006 கோயில்களில் குடமுழுக்கு நடத்த முடிவு செய்யப்பட்டுள்ளது.

இதுகுறித்து பட்ஜெட்டில் கூறப்பட்டுள்ள விவரம்: கோயில்கள், வழிப்பாட்டுத் தலங்களைப் பராமரிக்க மாநில அரசு அனைத்து நடவடிக்கைகளையும் மேற்கொண்டு வருகிறது. அதன்படி 2011-2012 நிதியாண்டில் 1006 கோயில்களில் குடமுழுக்கு நடத்தப்பட்டுள்ளது.

அதேபோன்று, வரும் நிதியாண்டிலும் (2012-2013) 1006 கோயில்களில் குடமுழுக்கு நடத்தப்படும். ஆக்கிரமிப்பில் உள்ள கோயில் சொத்துகளை மீட்க நடவடிக்கை எடுக்கப்படும். இது தொடர்பான வழக்குகளைத் தீர்க்க அமைக்கப்பட்டுள்ள சிறப்பு வருவாய் அலகுகளும், வருவாய் நீதிமன்றங்களும் வலுப்படுத்தப்படும்.

அன்னதானத் திட்டம்: அன்னதானத் திட்டம் 468 கோயில்களில் செயல்படுத்தப்பட்டு வருகிறது. வரும் நிதியாண்டில் (2012-13) இத்திட்டம் மேலும் 50 கோயில்களுக்கு விரிவுபடுத்தப்படும். அன்னதானம் நடைபெறும் கோயில்களில் சமையல் கூடம் நவீனப்படுத்தப்படும்.

ஸ்ரீரங்கம் அரங்கநாத சுவாமி கோயில் மற்றும் பழனி தண்டாயுதபாணி கோயில்களில் காலை 8 மணி முதல் இரவு 10 மணி வரை தொடர்ந்து அன்னதானம் நடைபெறும். ஸ்ரீரங்கத்தில் ரூ.25 கோடி செலவில் பயணியர் விடுதி அமைக்கும் பணிகள் நடைபெற்று வருகின்றன.

மாற்றுத் திறனாளிகளுக்கு கம்பிவடச் சீருந்து (ரோப்-கார்): பழனி தண்டாயுதபாணி கோயிலுக்கு வரும் மாற்றுத் திறனாளிகள், பெண்கள், குழந்தைகள் ஆகியோருக்கு வசதியாக நவீன தொழில்நுட்பத்துடன் கூடிய கம்பிவடச் சீருந்து அமைக்கப்படும்.

ஆன்மிக நீதிநெறி வகுப்புகள்: பண்டைய இலக்கியங்களில் உள்ள நற்பண்பு, நீதிக் கருத்துகளை பரப்பும் வகையில் கோயில்களில் வாரம்தோறும் சனிக்கிழமை அன்று மாணவர்களுக்கான ஆன்மிக நீதிநெறி வகுப்புகள் நடத்தப்படும். இந்த வகுப்புகளின் போது மாணவர்களுக்கு சிற்றுண்டி மற்றும் பரிசுகள் வழங்கப்படும்.