செவ்வாய் தோஷம் என்றால் என்ன?

by **ஆனந்தபைரவர்** Wed Aug 04, 2010 8:27 pm

இன்று எங்கு பார்த்தாலும் திருமண அமைப்பாளர்கள் மட்டுமல்லாமல் எல்லோரும் பயந்து ஒதுங்குவது இந்த வார்த்தையை கேட்டுத்தான், திருமண அமைப்பாளர்களைப் பொறுத்தவரையில் எதைச் சொன்னாலும் அதற்கு எதிர் மறைதான் பேசுவார்கள்.
அதாவது நம்மிடம் செவ்வாய் தோஷமுள்ள ஆணோ பெண்ணோ இருந்தால், தோஷம்உள்ளதை தேடித்தான் பார்க்கணும், இப்பல்லாம் தோஷமில்லாத வரன்தான் நிறைய வருது என்பார்கள்,

செவ்வாய் தோஷமில்லாத ஆணோ பெண்ணோ நம்மிடம் இருந்தால், தோஷம் இல்லாததை தேடித்தான் பார்க்கணும், இப்பல்லாம் தோஷமுள்ள வரன்தான் நிறைய வருது என்பார்கள்,

இவை இரண்டும் இல்லாத பரிகார செவ்வாய் தோஷமுள்ள ஆணோ பெண்ணோ நம்மிடம் இருந்தால், பரிகார செவ்வாய் தோஷம் உள்ளதை தேடித்தான் பார்க்கணும், இப்பல்லாம் பரிகார செவ்வாய் தோஷமுள்ள வரன் வருது இல்லை என்பார்கள்.

இப்படி திருமண அமைப்பாளர்களுக்கு ஏதாவது ஒன்றை இல்லை என்று சொன்னால்தான் வருமானம்.

நாம் தலைப்புக்கு வருவோம்

செவ்வாய் தோஷம் என்றால் என்ன?
அது என்ன செய்யும்?

முதலில் செவ்வாய் தோஷத்தில் எத்தனை வகைகள் ?

ஒன்று . செவ்வாய் தோஷம் உண்டு.

இரண்டு . செவ்வாய் தோஷம் இல்லை

மூன்று . பரிகாரச் செவ்வாய்

அவ்வளவுதான், மூன்றே மூன்றுதான்.
சரி இப்போது நமது இரத்த வகைகள் என்ன?

ஏ ,

பி,

ஓ, அவ்வளவுதானே

அதில் பாசிடிவ் நெகடிவ் என்ற வகைகள் பிரிக்கப்பட்டாலும்

அவை மூன்றுதானே.

சரி இப்போது நமக்கு ஏ இனம் கொண்ட இரத்தவகை என்று வைத்துக் கொள்வோம், ஒரு வீட்டில் போய் எனக்கு ஏ இனம் கொண்ட இரத்தம், உங்களுக்கு ஏ இனம் கொண்ட இரத்தமா என்று கேட்க முடியாதல்லவா?

ஆனால் எனது செவ்வாய் தோஷம், உங்களுக்கு செவ்வாய் தோஷம் உண்டா என்று கேட்கலாம்,

இரத்தவகையை தெரிந்து கொள்ளும் எளிய வழி இது அவ்வளவே!

இதற்கு என்ன அவசியம்?

திருமணமானவர்கள் குழந்தைப்பேறு இன்றி போவதும், பிறந்த குழந்தைகள் ஊனமாக பிறப்பதும், ஆயுள் பலமின்றி பிறப்பதும், கணவன், மனைவி சரீர சுகம் கெடுவதும், கணவனுக்கு அல்லது மனைவிக்கு மரணம் நேர்வது போன்றவைகளை கண்ட நமது பெரியோர்கள் என்ன காரணமென்று ஆராயும்போது கண்டதுதான் இரத்த மாறுதலின் காரணமாக இந்த குறைபாடுகள் உண்டாவதை கண்டு இரத்த வகையை ஆராய முற்பட்டார்கள் அவர்கள் கண்டுபிடித்தது மிகப் பெரிய பொக்கிஷம்.

அது, எந்த ஒரு ஜாதகத்திலும் லக்கினம் (அது எந்தவீடாக இருந்தாலும் சரி) எனப்படும் இடத்திற்கு இரண்டு, நான்கு, ஏழு, எட்டு, பனிரெண்டாம் வீடுகளில் செவ்வாய் இருந்தால் அது ஒரு வகையான இரத்தத்தையும் (1),

செவ்வாய் இருக்கும் அந்த வீடுகளை குருவோ, சனியோ, இராகு அல்லது கேதுவோ பார்த்தாலோ அல்லது செவ்வாய் இருக்கும் அந்த வீடுகள் மேஷம், கடகம், விருச்சிகம், மகரம், சிம்மம் போன்ற வீடுகளாக இருந்தாலோ அது வேறு வகையான இரத்தத்தையும் (2),
இவை அல்லாத நிலையில் அதாவது செவ்வாய் மேற்கண்ட எந்த நிலையும் இல்லாத போது செவ்வாய் வேறுவகையான இரத்தத்தையும்(3) உண்டு பண்ணுவதாக அறிந்தனர்.

அதற்கு அவர்கள் கொடுத்த பெயர்தான்:

1. செவ்வாய் தோஷம் உள்ள ஜாதகம்

2. பரிகார செவ்வாய் தோஷம் உள்ள ஜாதகம்

3. தோஷமில்லாத சுத்த ஜாதகம்.

இப்போது புரிகிறதா செவ்வாய் தோஷமென்றால் என்னவென்று?

பொதுவாக ஜாதகத்தில் செவ்வாய் இரத்த காரகனாக உள்ளது.

ஆனால் இந்தக்கால சில ஜோதிடர்களும், திருமண அமைப்பாளர்களும் இந்த விபரம் அறியாமல் அதனை ஏதோ ஒரு பெரியகுற்றமாக சித்தரித்து விட்டனர்.

செவ்வாய் தோஷம் உள்ள பெண்ணுக்கும் செவ்வாய் தோஷம் உள்ள ஆணுக்கும் ஒரே இரத்தமாகத்தான் இருக்கும்.

செவ்வாய் தோஷம் பரிகாரம் உள்ள பெண்ணுக்கும் செவ்வாய் தோஷம் பரிகாரம் உள்ள ஆணுக்கும் ஒரே இரத்தமாகத்தான் இருக்கும்.

செவ்வாய் தோஷம் இல்லாத பெண்ணுக்கும் செவ்வாய் தோஷம் இல்லாத ஆணுக்கும் ஒரே இரத்தமாகத்தான் இருக்கும்.

இதனால் அவர்களுக்கோ, அவர்களின் குழந்தைகளுக்கோ உடல், உயிர் சம்பந்தப்பட்ட எந்தவிதமான குறைபாடும் வராது.

ஆகவேதான் அதைப்போன்ற ஜாதகங்களையே சேர்க்க வேண்டும் என்கிறார்கள்.

மாற்றி சேர்க்கும்போது இரத்த வகை மாறுவதால் பலவகை தொல்லைகளுக்கும் ஆளாக நேரும்.

செவ்வாய் தோஷம் என்பது சரியான இரத்தவகை கொண்ட ஆணையும், பெண்ணையும் சேர்ப்பது தானே தவிர வேறொன்றும் இல்லை.

மேலும் செவ்வாய் தோஷப்படாத ஜாதகர்கள் உத்வேகம் அற்றவர்களாக, துணிச்சல் குறைந்தவர்களாக போகும் வாய்ப்பும் உள்ளது.

இனி செவ்வாய் தோஷம் என்றால் பயமில்லைதானே