யார் நமக்கு குரு ?

நம்மில் பலருக்கு தற்போதைய கேள்வி எப்படி ஒரு குருவை தேர்ந்தெடுப்பது என்பதுதான்!

உங்களுக்கு நீங்களே மிக சரியான குரு, ஆனாலும் வெளியே ஒரு குரு சிலருக்கு தேவைப்படுகிறது.

ஏனென்றால் சொல்வது மிக எளிது, குருவற்ற வித்தை பலிதமாகாது என்று ஒரு வார்த்தை வழக்கு ஒன்று நம்மிடையே உண்டு.

சரி, இன்றுதான் எல்லா குருமார்களும் ஏதோ ஒரு வகை குறைபாடு உள்ளவராகவே இருக்கிறார்கள்.

நாம் சரியான வழி தேடிப் போக நமக்கு வரும் குருவும் வழிதேடும் நபராகவே இருந்தால் நாம் எப்படி முதிர்வடைவது? என்ற பெரிய குழப்பம் வந்து விடுகிறதல்லவா?

இதற்கு ஒரு எளிமையான, நமக்கு உகந்த குருவை கண்டுபிடிக்கும் வழி ஓன்று உண்டு,
இதன்படி நமது குருவை நாம் அடையாளம் காணமுடியும்.

ஒரு குருவிடம் செல்கிறோம், அவரது பேச்சிலோ, ஒழுக்கத்திலோ, நடைமுறை வாழ்க்கையிலோ, எளிமையிலோ, பண்பிலோ அல்லது

நீங்கள் ஒரு குரு இப்படித்தான் இருக்கவேண்டும் என்று தீர்மானித்தபடியோ அவர் இருந்தாலும் சரி, இவை எதுவும் இல்லாமல் இருந்தாலும் சரி, உங்கள் குருவை அடையாளம் காணும் வழி என்னவென்றால்...

உங்களுக்கு ஊரில் நல்ல மதிப்புண்டு, ஆனால் இங்கே போனால் உங்களுக்கு மதிப்பில்லை,

உங்களுக்கு எல்லாவிதமான கேள்வி ஞானமும் உண்டு ஆனால் இங்கே போனால் முட்டாளாகி விடுகிறீர்கள்,

உங்களுக்கு எங்கும் மிகுந்த மரியாதை உண்டு, ஆனால் இங்கே போனால் கிட்டத்தட்ட அவமானமே ஏற்படுகிறது,

மொத்தத்தில் நமது, நான் என்கிற உணர்வு, நமது அகங்காரம், வீண் ஜம்பம் எல்லாம் தவிடு பொடியாகிறது.

நமது மனம் உடனே புறப்படு, ஏன் இத்தனை அவமானமும் உனக்கு என்கிறது, நாமும் புறப்பட்டு விடுகிறோம்,

ஆனால் உள் மனம் மீண்டும் அங்கேயே போகச் சொல்கிறது. அந்த அவமானத்தை ஏற்றுக்கொள்கிறது,

ஆமாம் நீ அப்படித்தான் என்று நம்மை சுட்டிக்காட்டி உண்மையை நமக்கு சொல்கிறது.

........என்றால் அந்த இடம்தான் உங்கள் குரு உள்ள இடம், அவர்தான் உங்கள் குரு.

அவர் வயதில் குறைவானவராக,

அறிவில் குறைந்தவராக,

உங்களைவிட வசதியில் குறைந்தவராக,

அனுபவத்தில் குறைந்தவராக,

ஒழுக்கம் இல்லாதவராகக் கூட இருக்கலாம்,

ஆனால் அவர்தான் உங்கள் குரு.

(ஒரு குரு காண முடியாத, பலநிலைகளை,

மாணவன் காணமுடியும். குரு பக்தி இருந்தால்).

அவரை விடாதீர்கள்,

நீங்கள் கண்டிப்பாக யோக நிலையில்,

த்யான நிலையில்,

அவரைவிட மேன்மை அடைய முடியும்.

நம்பிக்கையுடன் குருவை நாடுங்கள்,

நம்பிக்கையுடன் அவரது சொல்லைக் கேளுங்கள்,

நம்பிக்கையுடன் அவர் சொன்ன வழி செல்லுங்கள் ,

குரு முன்னேற வில்லை என்றாலும்

நீங்கள் கண்டிப்பாக முன்னேறுவீர்கள்.

இங்கே நமது கவியரசர் கண்ணதாசன் சொன்னதை நினைவு கூர்வது பொருந்தும் என நினைக்கிறேன், கவியரசு சொல்கிறார்,

“என்னைப் பின்பற்றாதீர்கள் என் எழுத்தைப் பின்பற்றுங்கள் ”

இது எல்லா விஷயங்களுக்கும் பொருந்தும்.

சொல்பவர் கருத்தை பின்பற்றுங்கள்,

சொல்பவர் செய்கையை பின்பற்றாதீர்கள்,

அது போதும், நீங்கள் உயர்வதற்கு.

எல்லாநிலைகளிலும் நீங்கள் உயர வாழ்த்துக்கள்



அன்புடன் கருணாகரன்